दिल्लीको होटलमा बसेर क्यानडा र अमेरिकामा मानव तस्करी 
अनलाइन जुवा खेलाएर काभ्रेका अनिलले गरे दुई अर्बको कारोबार 
मुख्यमन्त्री सोडारीले विश्वासको मत लिन सुदूरपश्चिमको प्रदेश सभा बैठक आव्हान 
अफगानिस्तानमा बाढीबाट ३१५ भन्दा बढीको मृत्यु 
सुँगुरको मिर्गौला प्रत्यारोपण गरिएका रिचर्डको निधन जुम्लामा ८ करोड लगानीमा फुजी स्याउ बगैँचा
जुम्ला : जुम्लाको गुठीचौर गाउँपालिका–५, काँडाखोला जलजलामा नेपालकै ठूलो फुजी स्याउ बगैँचा निर्माण भएको छ । करिब ८ करोड लगानीमा उच्च घनत्व जातको आधुनिक स्याउ बगैँचा निर्माण भएको गुठीचौर एग्रो फार्म प्रालिका अध्यक्ष मीनबहादुर भण्डारीले जानकारी दिए । कर्णाली प्रदेश भूमि व्यवस्था तथा कृषि सहकारी मन्त्रालयका सचिव डा. राजेन्द्रप्रसाद मिश्रले फुजी स्याउ रोपेर बगैँचा प्रारभ्भ भएको घोषणा गरेका थिए । बगैँचामा एकैपटक ३० हजार फुजी स्याउका बरुवा रोपिएको हो । सचिव मिश्रले भने, ‘यो नेपालको ठूलो स्याउ बगैँचा मात्र होइन, कृषि तालिम केन्द्रका रूपमा स्थापित हुनुपर्छ । अनुसन्धान केन्द्र बनाउनका लागि लाग्नुपर्छ । यो बगैँचा नेपालको स्याउ उत्पादनको सिलसिलामा एक सान नै हो ।’
उक्त अवसरमा सचिव मिश्रले भूमि व्यवस्था तथा कृषि सहकारी मन्त्रालयले स्याउको प्रशोधन, बजारीकरण, कृषि, सडकलगायतका प्राविधिक सहयोग गर्न सक्ने बताए । उनले कर्णालीमा लगानी भित्र्याउनेलाई सम्मान गर्नुपर्ने बताए । उनले भने, ‘जसले कर्णालीमै लगानी गर्छ, त्यो सम्मानित लगानीकर्ता हो । मीनबहादुर भण्डारी कर्णाली कृषि क्षेत्रका सम्मानित व्यक्ति हुनुहुन्छ । कर्णालीवासीले उहाँबाट सिक्नुपर्छ । उहाँको कार्यलाई पछ्याउँदै जानुपर्छ ।’
गत चैतदेखि बगैँचा स्थापनाको तयारी थालिएको थियो । लकडाउन अवधिभर बगैँचाको पूर्वाधार निर्माणदेखि बिरुवा रोप्ने तयारीसम्मका क्रियाकलाप भए । लकडाउनले उद्योग–धन्दा, सिर्जनशील काम बन्द भए । त्यही लकडाउनबीचमा ठूलो बगैँचा निर्माण भयो ।
गुठीचौर एग्रो फार्मका सहजकर्ता दानबहादुर बुढाले भने, ‘यो बगैँचा स्थापनाको कामले पूर्णता पाएसँगै स्थानीयले रोजगारी पाए । फुजी स्याउको विशाल बगैँचा जुम्लामा स्थापना भएको सन्देश फैलाउने अवसर मिल्यो । अर्काे वर्ष २० हजार बिरुवा रोप्ने तयारी गरेका छौँ ।’ उनले भने यसमा स्याउ सुपरजोन जुम्लाले बिरुवा र सिँचाइमा लगानी गर्ने प्रतिबद्धता जनाएको बताए ।
डेढ लाख वर्गमिटर जग्गामा स्याउखेती
बगैँचामा स्याउ रोप्नुअघि आकारप्रकार तयार भयो । बगैँचा निर्माणका लागि ८७ जनाले जग्गा लिजमा दिए । १ लाख ५० हजार वर्गमिटर जग्गामा पूर्वाधारसहितको सुविधासम्पन्न स्याउ बगैँचा निर्माण भयो । ३० वर्ष लिजमा लिएको जग्गामा झन्डै ८ करोड रुपैयाँ खर्च भइसकेको छ ।
स्थानीय युवालाई रोजगार
बगैँचामा दैनिक डेढ सयदेखि अढाई सयसम्म कामदारले रोजगार पाएका छन् । गाउँमै नेपालकै ठूलो बगैँचा स्थापना भएपछि स्थानीय खुसी छन् । उनीहरूले स्याउ बगैँचामा काम पाउनुका साथै स्याउ फलाउनका लागि प्रेरणा मिल्ने बताए । लगानीकर्ता मीनबहादुर भण्डारीले जडीबुटी व्यापार गर्दा कमाएको रकमले आफ्नै भूमिमा स्याउ बगैँचा स्थापना गर्न पाउँदा खुसी लागेको बताए । उनले भने, ‘यो स्याउ बगैँचामा अर्गानिक मलको प्रयोग हुनेछ ।’ उनले २३ लाख रुपैयाँमा मल खरिद गरेर बिरुवामा राखेका छन् ।
उनले स्याउखेती गरेर कृषिकर्मको एक परिचय दिने लक्ष्य रहेको बताए । मीनबहादुरले भने, ‘बगैँचाबाट हुने आम्दानी शिक्षा, स्वास्थ्यसँगै सामाजिक कार्य र पारिवारिक समृद्धिमा लगाउँछु ।’ यो बगैँचालाई नमुना बगैँचा बनाइराख्न पनि सदैव तत्पर रहेको बताए ।
यो खबर पढेर तपाईलाई कस्तो महसुस भयो ?
