चिनिको मूल्य किन एक्कासी महँगियो नेपालमा ?
२९ जेठ, काठमाडौं । प्रतिकिलो चिनीको मूल्य १० रुपैयाँले वृद्धि भएको छ । ९५ रुपैयाँ रहेको चिनी १० रुपैयाँले बढेर १०५ पुगेको हो ।
भारतले चिनीको निर्यातमा प्रतिबन्ध लगाएसँगै चिनीको भाउ बढेको हो । नेपालमा चिनीको माग धान्न भारतबाट चिनी ल्याउने गरिएको छ । हाल नेपालमा औद्योगिक र उपभोग प्रयोजनको लागि वार्षिक करिब दुई लाख ५० हजार मेट्रिक टन चिनी खपत भइरहेको छ । यसमध्ये करिब एक लाख ३० हजार स्वदेशी उत्पादनले धानिरहेको छ । बाँकी विभिन्न मुलुकबाट आयात गरिन्छ ।
भारतबाट मात्रै चालु आर्थिक बर्षको १० महिनामा ८९ हजार मेट्रिक टन चिनी आयात भएको थियो । कुल चार अर्ब ७० करोड बराबरको चिनी आयात भएको हो ।
चिनीको मूल्य वृद्धि भए पनि व्यापारीले आफूखुसी चिनी बिक्री गर्दै आएका छन् । अहिले चिनीको मूल्य १० रुपैयाँले वृद्धि भएपछि व्यापारीले फरक फरक मूल्यमा चिनी बेच्नेका गरेको पाइएको छ । कसैले १०५ कसैले ११० रुपैयाँमा प्रतिकिलो चिनी बेच्दै आएका छन् ।