भारतबाट २२ लाख किलो कोदो आयात
काठमाण्डौ – नेपाललाई कृषिप्रधान देश भनिए पनि सबैजसो कृषि सामग्री विदेशबाट आयात हुन्छन् ।
गएको आर्थिक वर्षमा साढे ३३ अर्ब रुपैयाँभन्दा धेरैको धान/चामलमात्रै आयात भएको छ । हरियाे सागपातदेखि तरकारीसम्म विदेशबाटै आयात हुन्छ ।
अचम्मको कुरा त नेपालको पाखा बारीमै फल्ने कोदोसमेत विदेशबाटै आयात हुन्छ । त्यो पनि लाखौँ किलोको मात्रामा । गएको आर्थिक वर्ष २०७६/७७ मा झण्डै २२ लाख किलो कोदो आयात भएको छ।
गएको वर्ष २१ लाख ७२ हजार ६ सय २५ किलो कोदो भारतबाट आयात भएको भन्सार विभागको तथ्याङ्कमा छ । विभागकाअनुसार आयात भएको कोदोको मूल्य ७ करोड १५ लाख १७ हजार रुपैयाँ रहेको छ ।
आर्थिक वर्ष २०७५/७६ मा आठ करोड तीन लाख रुपैयाँ बराबरको २९ लाख १० हजार किलो कोदो आयात भएको थियो । यो सबै भारतबाट आयात भएको हो ।